މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯ، އޭނާގެ ގިނަ ދުވަސްވީ ބައިވެރިޔާ ޖޯޖީނާ ރޮޑްރިގޭޒްއާ ކައިވެނި ކުރުމަށްޓަކައި، އޭނާ އުފަންވި ޕޯޗުގަލްގެ މަކަރީރާ އައިލެންޑްގައި ކުލަގަދަ ރަސްމިއްޔާތެއް ބޭއްވުމަށް ތައްޔާރުވަމުންދާ ކަމަށް ރިޕޯޓްތައް ބުނެފިއެވެ.
މި ކައިވެނީގެ ރަސްމިއްޔާތު އޮންނާނީ އަންނަ އޮގަސްޓް މަހުގެ 8 ވާ ހޮނިހިރު ދުވަހު މަކަރީރާގެ ފަންޗަލް ކެތީޑްރަލްގައެވެ. ކައިވެންޏަށްފަހު އޮންނަ އުފާފާޅުކުރުމުގެ ހަފުލާތައް ބޭއްވުމަށް ހަމަޖެހިފައިވަނީ އެ ސަރަހައްދުގައި ހުންނަ ފަސް ތަރީގެ ސެވޯއީ ޕެލެސް ހޮޓަލުގައެވެ.
ކައިވެނީގެ ރަސްމިއްޔާތު ބޭއްވުމަށް ރޮނާލްޑޯގެ އުފަން ރަށް މަކަރީރާ އިޚްތިޔާރު ކުރުމަކީ އޭނާއަށް ނުހަނު އަސަރުގަދަ ކަމެކެވެ. އުމުރުން 41 އަހަރުގެ ރޮނާލްޑޯއަކީ ފަންޗަލްއަށް އުފަން، އެ ރަށުގައި އޭނާގެ ޅަ އުމުރުގެ ދުވަސްތައް ހޭދަކުރި ކުޅުންތެރިއެކެވެ. އޭނާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނުމުގެ ދަތުރު ފެށީވެސް މި ރަށުންނެވެ.
ރޮނާލްޑޯ އާއި ޖޯޖީނާ ބައްދަލުވީ 2016 ވަނަ އަހަރު މެޑްރިޑްގެ ގޫޗީ ސްޓޯރަކުންނެވެ. އޭގެ ފަހުން އެ ދެމީހުންގެ ގުޅުމަކީ ފުޓްބޯޅަ ދުނިޔޭގައި އެންމެ ފާހަގަކޮށްލެވޭ އެއް ޖޯޑެވެ.
ކުރިން ރޮނާލްޑޯ ރާވާފައި އޮތީ 2026 ވަނަ އަހަރުގެ ފީފާ ވޯލްޑް ކަޕަށްފަހު ކައިވެނި ކުރުމަށެވެ. އޭނާގެ އުންމީދަކީ ވޯލްޑް ކަޕް ކާމިޔާބުކޮށް، ދުނިޔޭގެ ޗެމްޕިއަނެއްގެ ގޮތުގައި ކައިވެނީގެ މޭޒަށް ދިއުމެވެ. ނަމަވެސް ޕޯޗުގަލް ވޯލްޑް ކަޕުން ކެޓުމާއެކު، މިހާރު މިވަނީ ކައިވެނީގެ ތައްޔާރީތައް ފަށާފައެވެ.
