ދިރިއުޅުން ނޫން އެހެނިހެން ބޭނުންތަކަށް ބިންތައް ދޫކުރުމުގައި ޢަމަލުކުރަންޖެހޭ އިޖުރާޢަތުތައް ކަނޑައަޅައި، ބިމާ ބެހޭ ޤާނޫނުގެ ދަށުން އެކަމުގެ އައު ޤަވާއިދު ނިމިދިޔަ ހަފުތާގެ ތެރޭގައި ސަރުކާރުން އެކުލަވާލައި ޢާއްމުކޮށްފިއެވެ. މި ޤަވާއިދުގެ ސަބަބުން މީގެ ކުރިން ބިން ދޫކުރުމުގައި ދިމާވަމުން އައި ގިނަ ދަތިތަކާއި ފުށުއެރުންތަކަށް ދާއިމީ ހައްލެއް ލިބިގެންދާނެ ކަމަށް ބެލެވެއެވެ.
އައު ޤަވާއިދުގައިވާ ގޮތުން، ދިރިއުޅުން ނޫން ބޭނުންތަކަށް ދޫކުރާ ބިމުގެ އަގު ކަނޑައަޅާނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކުލަވާލައްވާ 'ލޭންޑް ވެލުއޭޝަން ކޮމިޓީ' އަކުންނެވެ. ކަމާގުޅުންހުރި ވުޒާރާތަކުގެ މަންދޫބުން ހިމެނޭ މި ކޮމިޓީގައި ޖުމްލަ 9 މެންބަރުން ތިއްބަވާނެއެވެ. އަދި ކޮމިޓީގެ މުޤައްރިރަކަށް ހުންނަވާނީ ރައީސުލްޖުމްހޫރިއްޔާ އައްޔަނުކުރައްވާ ބޭފުޅެކެވެ.
މި ޤަވާއިދުގެ ދަށުން ބިން ދޫކުރެވޭނެ 6 ގޮތެއް ވަނީ ކަނޑައަޅާފައެވެ. އެއީ:
1. ކުއްޔަށް ދިނުން.
2. ވިއްކުން.
3. ވަގުތީ ގޮތުން ބެލެހެއްޓުމަށް ދިނުން.
4. ދައުލަތުގެ ވުޒާރާތަކާއި އިދާރާތަކުގެ މަސްޢޫލިއްޔަތު އަދާކުރުމަށް ދިނުން.
5. ކުއްޔަކާ ނުލައި ދިނުން.
6. ސަރުކާރުގެ މެޖޯރިޓީ ޙިއްޞާ އޮންނަ ކުންފުނިތަކަށް ބިން ދޫކުރުން.
އައު ޤަވާއިދުގެ އެންމެ މުހިންމު އެއް ބަޔަކީ ބިމުގެ ދަފްތަރު އަދާހަމަކުރުމަށް ދީފައިވާ މުއްދަތެވެ. އެގޮތުން، ބިމުގެ ދަފްތަރު ފުރިހަމަކޮށް އަދާހަމަކުރުމަށް 6 މަސްދުވަހުގެ މުއްދަތެއް ވަނީ ދީފައެވެ. ޤަވާއިދުގެ 22 ވަނަ މާއްދާގައިވާ ގޮތުން، ބިން ދޫކުރާ ކައުންސިލްތަކުން ނުވަތަ އިދާރާތަކުން ބިމުގެ ތަފްސީލީ ދަފްތަރެއް ބަލަހައްޓަންޖެހެއެވެ. އަދި ކޮންމެ މަހަކު އެއްފަހަރު މި މަޢުލޫމާތުތައް މިނިސްޓްރީއާ ޙިއްޞާކޮށް، ޤައުމީ ބިމުގެ ދަފްތަރު އަދާހަމަކުރަން ޖެހޭނެއެވެ.
މީގެ ކުރިން ބިން ރަޖިސްޓްރީ ކުރުމުގައި ކައުންސިލްތަކާއި ވުޒާރާތަކާ ދެމެދު އޮންނަ އިދާރީ މައްސަލަތަކުގެ ސަބަބުން ބިން ގަންނަ ފަރާތްތަކަށް ބޮޑެތި ގެއްލުންތަކެއް ދިމާވަމުން ދިޔައެވެ. ނަމަވެސް، އައު ޤަވާއިދުގައި ބިމުގެ ރަޖިސްޓްރީ ހެދުމުގެ ބާރު ބިމުގެ އިހްތިސާސް އޮތް ފަރާތަށް ދީފައިވާތީ، ރަޖިސްޓްރީ ކުރުމުގެ މަރުޙަލާ އަވަސްވެ، ދިމާވާ ގޮންޖެހުންތަކަށް ނިމުމެއް އަންނާނެއެވެ.
މީގެ އިތުރުން، ސަރުކާރުގެ ކުންފުނިތަކާއި އިދާރާތަކަށް ބިން ދޫކުރުމުގައި ރައީސުލްޖުމްހޫރިއްޔާގެ ހުއްދައާއެކު ބިން ދޫކުރެވޭނެ މަގު ވަނީ ތަނަވަސްކޮށްދީފައެވެ. މީގެ ސަބަބުން، ޚިޔާލުތަފާތުވުންތަކާ ހުރެ ބިން ނުލިބިގެން ރައްޔިތުންނަށް ބޭނުންވާ މުހިންމު މަޝްރޫޢުތައް މަޑުޖެހޭ މަޑުޖެހުމަށް ހައްލެއް ލިބޭނެއެވެ.
2003 ވަނަ އަހަރުން ފެށިގެން ޢަމަލުކުރަމުން އަންނަ ބިމާ ބެހޭ ޤާނޫނުގެ ދަށުން އެކުލަވާލި މި ޤަވާއިދު ތަންފީޒުކުރުމުގެ ޒިންމާ އޮންނާނީ އެ ބިމެއް ނިސްބަތްވާ ލޯކަލް ކައުންސިލަކަށެވެ. މިއީ ދެ ފުށް ފެންނަ، ހަރުދަނާ ނިޒާމެއްގެ ދަށުން ރާއްޖޭގެ ބިންތައް ބެލެހެއްޓުމަށް އެޅުނު މުހިންމު ފިޔަވަޅެއްގެ ގޮތުގައި ސަރުކާރުން ސިފަކުރެއެވެ.
