ގދ. ތިނަދޫ، ސިޓީއަކަށް ބަދަލުކުރުމަށްޓަކައި އެ ރަށުގެ އާބާދީގެ ސައްހަކަން އޮޅުވާލާފައިވާ ކަމަށް ކުރެވޭ ތުހުމަތުތަކާ ގުޅިގެން، އެ ސިޓީގެ މޭޔަރު ސައުދު އަލީ މިދިޔަ ހޯމަ ދުވަހު ފުލުހަށް ހާޒިރުކޮށްފިއެވެ.
ތިނަދުއަށް ސިޓީއެއްގެ ދަރަޖަ ދީފައިވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި، 2023 ވަނަ އަހަރު ބޭއްވި ރިޔާސީ އިންތިހާބުގެ ކެމްޕެއިން ތެރޭގައެވެ. ރާއްޖޭގެ ލާމަރުކަޒީ ގާނޫނު ބުނާގޮތުން، ރަށަކަށް ސިޓީއެއްގެ ދަރަޖަ ދެވޭނީ އެ ރަށެއްގެ އާބާދީގައި މަދުވެގެން 10,000 މީހުން ހަމަވުމުންނެވެ. ނަމަވެސް، އެ ދުވަސްވަރުގެ ތަފާސްހިސާބުތަކުން ދައްކާގޮތުގައި ތިނަދޫގެ މުޅި އާބާދީއަކީ ގާތްގަނޑަކަށް 8,000 އެވެ. އަދި އޭގެ ތެރެއިން ވެސް ރަށުގައި ދިރިއުޅެނީ 5,000 އެއްހާ މީހުން ކަމަށް ލަފާކުރެވެއެވެ.
އޭރު ރައީސް ސޯލިހު ވިދާޅުވެފައިވަނީ ތިނަދޫ ސިޓީއަކަށް ބަދަލުކުރަން ނިންމައި ގަރާރުގައި ސޮއިކުރެއްވީ، ލާމަރުކަޒީ ގާނޫނުގައި ބުނާ ހުރިހާ ޝަރުތުތަކެއް އެ ރަށުގައި ފުރިހަމަވާތީ ކަމަށެވެ. ތިނަދުއަށް ސިޓީގެ ދަރަޖަ ދިނުމަކީ ރައީސް ސޯލިހުގެ ރިޔާސީ ވައުދެއް ވެސް މެއެވެ.
މި މައްސަލައިގައި އޮޅުވާލުންތަކެއް ހުރި ކަމަށް ބުނެ މީގެ ކުރިން އާންމުންގެ ބަޔަކު ވަނީ ފުލުހަށާއި އެންޓި-ކޮރަޕްޝަން ކޮމިޝަން (އޭސީސީ) އަށް މައްސަލަ ހުށަހަޅާފައެވެ. މި ތުހުމަތުތަކާ ގުޅިގެން މިދިޔަ އަހަރު އޭސީސީގެ ޓީމަކުން ވަނީ ތިނަދޫ ސިޓީ ކައުންސިލްގެ އިދާރާ ފާސްކޮށް، ބައެއް ލިޔެކިޔުންތައް ތަހުގީގަށް ގެންގޮސްފައެވެ.
ފުލުހަށް ހާޒިރުވުމަށްފަހު މޭޔަރު ސައުދު ވިދާޅުވީ، މައްސަލަ ހުށަހެޅިތާ ގިނަ ދުވަސްތަކެއް ފަހުން އޭނާ ހާޒިރުކުރީ ސިޔާސީ މަގުސަދެއްގައި ކަމަށެވެ. އޭނާ ތުހުމަތު ކުރެއްވި ގޮތުގައި މި ދަނޑިވަޅުގައި އޭނާ ފުލުހަށް ހާޒިރުކުރީ ތިނަދޫގައި މީހުން އާބާދުވިތާ 60 އަހަރު ފާހަގަކުރުމަށް ބޮޑު ހަރަކާތެއް ބޭއްވުމަށް ތައްޔާރުވަމުންދާތީއެވެ.
"ސިޔާސީ ގޮތުން ކިތަންމެ ފިއްތުންތަކެއް ކުރިމަތިކުރުވިއަސް އޮގަސްޓް 22 ފާހަގަކުރާނެ. އެ ދުވަހާ ގުޅިގެން އޮގަސްޓް 20 ވަނަ ދުވަހުން ފެށިގެން 3 ދުވަހުގެ ހަރަކާތްތައް ކުރިއަށްދާނެ،" ސައުދު ވިދާޅުވިއެވެ.
އާބާދީ އޮޅުވާލި މައްސަލައިގައި ސައުދު ފުލުހަށް ހާޒިރުކުރިއިރު، ލޯކަލް ގަވަމަންޓް އޮތޯރިޓީ (އެލްޖީއޭ) އަށް ހުށަހެޅުނު އެހެން މައްސަލަތަކަކާ ގުޅިގެން ހިންގި އިންކުއަރީއަކަށްފަހު، ދާދި ފަހުން ތިން މަސް ދުވަހުގެ މުއްދަތަށް އޭނާ ސަސްޕެންޑް ވެސް ކުރިއެވެ.
